Факультэт традыцыйнай беларускай культуры і сучаснага мастацтва

Адрас: 220001, г. Мінск, вул. Рабкораўская, 17
каб. 712, 713 тэл. (017) 222 83 51

Дэкан факультэта - кандыдат культуралогіі, дацэнт Наталля Яўгенаўна Шалупенка.

Факультэт традыцыйнай беларускай культуры і сучаснага мастацтва створаны ў 2003 годзе згодна з планам рэструктурызацыі Беларускага дзяржаўнага універсітэта культуры. Асноўная мэта факультэта – спрыяць далейшай трансляцыі ў часе ўзораў мыслення і паводзін, характэрных для носьбітаў этнічнай культуры карэннага народа краіны, – беларусаў.

На факультэце існуюць 5 кафедраў: кафедра народнага дэкаратыўна-прыкладнога мастацтва, кафедра тэатральнай творчасці, кафедра рэжысуры беларускіх абрадаў і свят, кафедра этналогіі і фальклору, кафедра харэаграфіі.

Факультэт мае значны навуковы і творчы патэнцыял. Сярод яго выкладчыкаў – дактары навук, кандыдаты навук, прафесары, дацэнты. Выкладчыкі факультэта кіруюць студэнцкімі творчымі калектывамі і навукова-даследчымі лабараторыямі ў галіне народнага мастацтва.

КАФЕДРА РЭЖЫСУРЫ АБРАДАЎ І СВЯТ
Рабкораўская, 17, пакой 719, тэл. 222 83 60

Загадчык кафедры Гуд Пётр Адамавіч на выпускным бале ў Палацы Рэспублікі Загадчык кафедры – кандыдат гістарычных навук, прафесар П.А.Гуд. Кафедра рэжысуры абрадаў і свят працуе з 1992 года. Рыхтуе студэнтаў па 2-х спецыялізацыях: “рэжысура народных абрадаў і свят” і “рэжысура масавых відовішчаў і свят”.

У Беларусі шырока вядомыя калектывы, створаныя пры кафедры: Духоўны тэатр “Анёл” (кіраўнік – Наталля Міцкевіч), Тэатр беларускай народнай гульні (кіраўнік – Аляксей Камінскі). Студэнцкія калектывы прымалі ўдзел у шматлікіх святах: Міжнародным кінафестывалі “Лістапад”, Усебеларускім фэсце нацыянальных культур, Міжнародным фестывалі мастацтваў “Славянскі базар”, Усебеларускім свяце народнага гумару у Аўцюках, Міжнародным свяце народнай музыкі “Звіняць цымбалы і гармонік”, Фальклорным фестывалі ў Германіі, Тэатральным фестывалі ў Францыі, Фальклорным фестывалі Іспаніі, Міжнародным караване Масква-Капенгаген, Фестывалі моладзі і студэнтаў у Маскве, Сусветным форуме міралюбівых сіл у Мінску, Міжнародным фестывалі беларускай песні ў Польшчы і інш.

Выкладчыкамі кафедры выдадзены шматлікія навуковыя працы па праблемах беларускай святочна-абрадавай культуры. Выпускнікі кафедры плённа працуюць у розных установах сацыяльна-культурнай сферы. Сярод іх — салістка ансамбля “Сябры” Алеся Ярмоленка, дырэктар Гомельскага абласнога тэатра лялек Дзмітрый Гарэлік, мастацкі кіраўнік Першага нацыянальнага канала тэлебачання Яўген Блізнюк, дырэктар Міжнароднага дзіцячага кінафестывалю “Лістападзік” Генадзь Плескацэвіч. Шмат былых студэнтаў кафедры працуе на тэлебачанні, у кіно, у клубных і навучальных установах, прадзюсерскіх цэнтрах, фірмах па вытворчасці і дэманстрацыі феерверкаў Беларусі, а таксама ў Расіі, Украіне, Прыбалтыцы, Германіі, Італіі, Арабскіх Эміратах, ЗША, Японіі.

КАФЕДРА ХАРЭАГРАФІІ
Рабкораўская, 17, пакой 509, тэл. 222 83 23

Загадчык кафедры харэаграфіі – кандыдат філалагічных навук, прафесар С.В.Гуткоўская. Кафера заснавана ў 1977 годзе і вядзе падрыхтоўку спецыялістаў у галіне харэаграфічнага мастацтва па спецыялізацыях: “народны танец”, “бальны танец”, “эстрадны танец”.

Ансамбль кафедры хореографии под руководством Светланы Вячеславовны Гутковской

За гэты перыяд дастаткова трывала склаўся выкладчыцкі састаў кафедры, аснову якога складаюць такія вядомыя дзеячы беларускай культуры як доктар мастацтвазнаўства, прафесар Ю.М.Чурко, народныя артысты Рэспублікі Беларусь У.У.Іваноў і І.А.Душкевіч, дацэнты Л.П.Яфрэмава, А.М.Шылкіна, Н.М.Лаўрухіна, В.В.Лысянкова, В.П.Бяляева, Н.У.Карчэўская і інш.

Адметнай рысай кафедры з’яўляецца актыўнае творчае жыццё: ўдзел студэнтаў у прэстыжных міжнародных і рэспубліканскіх фестывалях і конкурсах (Міжнародны фестываль сучаснай харэаграфіі і Міжнародны фестываль мастацтваў “Славянский базар” в Витебске, Міжнародны фестываль харэаграфічнага мастацтва “Сожскі карагод” і інш.).

На кафедры дзейнічаюць творчыя калектывы: Ансамбль кафедры харэаграфіі (мастацкі кіраўнік – С.В.Гуткоўская) – лаўрэат Спецыяльнага фонда Прэзідэнта Рэспублікі Беларусь, “Майстэрня эстраднага танца” (кіраўнік – Л.П.Яфрэмава). Студэнты бальнага аддзялення з’яўляюцца неаднакратнымі пераможцамі і прызёрамі Чэмпіянату РБ па спартыўных танцах. Некаторыя з іх зарэкамендавалі сябе і на міжнароднай арэне.

Прафесійнае майстэрства калектыву кафедры ведаюць не толькі ў Беларусі, але і на Украіне, Расіі, Прыбалтыцы, Польшчы, Іспаніі, Партугаліі, ЗША.

Кафедра ганарыцца сваімі выпускнікамі, якія працуюць у нашай рэспубліцы і за яе межамі: заслужаны дзеяч культуры Г.Чорны, які з’яўляецца балетмайстрам выдатнага калектыва народнага танца “Крупіцкія музыкі”, мастацкі кіраўнік ансамбля танца “Чабарок” Н.Дзягель, заслужаны работнік культуры Рэспублікі Беларусь П.Свярдлоў, дырэктар і мастацкі кіраўнік рэкламнага мадэльнага агенцтва А.Варламаў, вядомыя артысты беларускага балета С.Манзалеўскі, В.Саркісьян, Ю.Траян, мнагакратны чэмпіён Беларусі А.Бушчык, чэмпіён Усходняй Еўропы, мнагакратная чэмпіёнка Беларусі сярод юніёраў В.Столяр, чэмпіенка Беларусі А.Феактыстава, чэмпіён Рэспублікі Беларусь па спартыўных танцах, майстар спорту Рэспублікі Беларусь, паўфіналіст Кубка Свету і Еўропы С.Чыжык і інш.

Кафедрай пастаянна арганізуюцца сумесныя творчыя праекты ў галіне харэаграфічнага мастацтва: сумесныя беларуска-амерыканскія праекты (з Нью-йоркскім універсітэтам (ЗША), з амерыканскай хіп-хоп і брэйк-данс групай “Havi Koro”, з вядомымі амерыканскімі балетмайстрамі-пастаноўшчыкамі Н.Пульвермахер, М.Парксам), сумесны беларуска-сеульскі праект “Карэйскі народны танец” і інш.

КАФЕДРА НАРОДНАГА ДЭКАРАТЫЎНА-ПРЫКЛАДНОГА МАСТАЦТВА
Маскоўская, 18а, пакой 5, тэл. 222 80 62

Рынкевич Уладзімір Іванавіч Загадчыкам кафедры з’яўляецца кандыдат мастацтвазнаўства, прафесар У.І.Рынкевіч. Спецыялізацыя “Народныя рамёствы” была створана ў Беларускім дзяржаўным універсітэце культуры і мастацтваў у 1990 годзе, а ў 1993 годзе распачала сваю дзейнасць названая кафедра. Яна рыхтуе спецыялістаў па дзвюх спецыялізацыях: “народныя рамёствы” і “рэстаўрацыя твораў дэкаратыўна-прыкладнога мастацтва”. Студэнты вучацца не толькі ў аўдыторыях, але і праходзяць вучэбную і вытворчую практыку, выязджаюць на пленэры і экспедыцыі ў Мір, Нясвіж, Навагрудак, на Браслаўшчыну. Выпускнікі і студэнты кафедры з’яўляюцца лаўрэатамі шматлікіх рэспубліканскіх і міжнародных конкурсаў, членамі творчых саюзаў, удзельнікамі рэспубліканскіх фестываляў і замежных выстаў.

Асноўны кантынгент выкладчыцкага калектыву – навукоўцы і мастакі-практыкі, большасць з якіх з’яўляюцца членамі Беларускага саюза мастакоў. На кафедры працуюць тры кандыдаты навук, прафесар, шэсць дацэнтаў, два магістры мастацтваў.

Сапраўдным палігонам творчых эксперыментаў з’яўляюцца спецыялізаваныя майстэрні па кераміцы, ткацтве, габелене, батыку, саломапляценні, скульптуры, якімі кіруюць вопытныя майстры сваёй справы. Моцныя акадэмічныя веды па малюнку, жывапісе і кампазіцыі студэнты набываюць на занятках вядомых у рэспубліцы мастакоў і мастацтвазнаўцаў. За перыяд існавання кафедра сфарміравалася ў дзейсны вучэбны, навукова-даследчы і метадычны цэнтр.

КАФЕДРА ТЭАТРАЛЬНАЙ ТВОРЧАСЦІ

Рабкораўская, 17, пакой 713, тэл. 222 83 59

Загадчык кафедры – кандыдат мастацтвазнаўства, дацэнт Р.Л.Бузук. Кафедра была створана ў 1975 годзе. Вядзе падрыхтоўку па спецыялізацыях: «тэатральная творчасць» і «літаратурная работа (драматургія)».

Сярод выпускнікоў кафедры ёсць вядомыя тэатральныя рэжысёры В.Грыгалюнас, У.Буйко, І.Маркава, акцёры В.Немец, І.Чарапко, В.Казлоў, Г.Арыніч-Анісенка, В.Буслаева, А.Марчанка, А.Дабравольскі, Р.Кроман, М.Паніматчанка, А.Салодкая, драматургі А.Карэлін, М.Рудкоўскі, кінасцэнарыст, рэжысёр, драматург А.Богдан, кінарэжысёр М.Мажар, галоўны дырэктар Нацыянальнага тэлеканала «ЛАД» С.Кухто і інш.

Выпускнікі кафедры працуюць у прафесійных тэатрах Беларусі ў якасці акцёраў і рэжысёраў: у Рэспубліканскім тэатры беларускай драматургіі, Беларускім дзяржаўным маладзежным тэатры, Рэспубліканскім тэатры юнага гледача, Брэсцкім акадэмічным тэатры драмы і музыкі, Мінскім абласным драматычным тэатры, Гродзенскім абласным драматычным тэатры, узначальваюць аматарскія тэатральныя калектывы, з'яўляюцца стваральнікамі тэатраў-студый і тэатральных гурткоў, супрацоўнікамі беларускіх тэлерадыёкампаній, кінастудыі «Беларусьфільм».

Многія выпускнікі, студэнты і выкладчыкі кафедры тэатральнай творчасці з'яўляюцца членамі пісьменніцкіх і тэатральных саюзаў.

Пераважную большасць супрацоўнікаў кафедры складаюць прафесары і дацэнты, якія маюць навуковую ступень, народныя і заслужаныя артысты, лаўрэаты Дзяржаўнай прэміі Рэспублікі Беларусь.

КАФЕДРА ЭТНАЛОГІІ І ФАЛЬКЛОРУ

Маскоўская, 18а, каб. 3, тэл. 222 80 62

Кафедра створана 1 кастрычніка 2003г. Яе загадчыкам з’яўляецца кандыдат культуралогіі, дацэнт В.В.Калацэй. Кафедра вядзе падрыхтоўку па спецыялізацыях: “этнафоназнаўства (аўтэнтычныя народныя спевы)”, “народная творчасць (тэарэтычны фальклор)”.

Пры кафедры этналогіі і фальклору ў 2004 г. пад патранажам Камісіі ЮНЕСКА па захаванні нематэрыяльнай культурнай спадчыны чалавецтва створаны Цэнтр па вывучэнні і захаванні нематэрыяльнай культурнай спадчыны беларусаў “Адвечнае”, а ў 2005г. – Музей традыцыйнай беларускай культуры “Беларускія абярэгі”, калекцыя якога налічвае каля 400 экспанатаў.