Факультэт культуралогіі і сацыякультурнай дзейнасці

Дэкан – кандыдат педагагічных навук, дацэнт Каралёў Мікалай Мікалаевіч

Факультэт культуралогіі і сацыякультурнай дзейнасці існуе больш за 30 год. За гэты час падрыхтавана звыш 10 тысяч выпускнікоў, якія працуюць ва ўсіх рэгіёнах Беларусі. Сёння ён налічвае каля 700 студэнтаў.

Падрыхтоўка спецыялістаў ажыццяўляецца па найбольш перспектыўных і запатрабаваных кірунках.

Спецыяльнасць – культуралогія. Спецыялізацыя – менеджмент сацыяльнай і культурнай сферы. Кваліфікацыя – культуролаг-менеджэр. Працэс навучання на спецыялізацыі “менеджмент сацыякультурнай сферы” зарыентаваны на глыбокую гуманітарную і культуралагічную падрыхтоўку спецыялістаў па сусветных адукацыйных і прафесійных стандартах. Выпускнікі кафедры валодаюць ведамі менеджменту, маркетынгу і рэкламы ў сферы культуры, эканомікі і прадпрымальніцтва, айчыннага і замежнага права, знешнеэканамічнай дзейнасці, інфарматыкі і вылічальнай тэхнікі, замежнымі мовамі, а таксама тэхналогіямі арганізацыі сацыякультурнай і дасугавай дзейнасці.

Падрыхтоўка культуролагаў-менеджэраў сацыякультурнай сферы накіравана на наступныя віды прафесійнай дзейнасці: менеджмент канцэртна-гастрольнай дзейнасці (менеджэр канцэртна­відовішчных праграм); менеджмент кіна-відэа пракату (прадзюсер, менеджэр кіна­відэа дзейнасці); менеджмент турыстычнай дзейнасці (менеджэр культурнага турызму). менеджмент на тэлебачанні і радыё (менеджэр тэлебачання і радыё); грамадскія сувязі ў сферы культуры (менеджэр па Public Relations); менеджмент у сферы індустрыі дасуга (менеджэр культурна-забаўляльных праграм); рэкламны менеджмент у сферы культуры (менеджэр па рэкламе); менеджмент у сферы выяўленчага мастацтва (менеджэр галерэйнай справы); міжнародныя культурныя сувязі (менеджэр міжнародных культурных сувязей).

Спецыяльнасць – культуралогія. Спецыялізацыя – менеджмент міжнародных культурных сувязей. Кваліфікацыя – культуролаг-менеджэр.

Спецыяліст пасля адаптацыі павінен быць падрыхтаваны да арганізацыйна-кіраўнічай, інавацыйна-метадычнай, камерцыйнай, маркетынгавай, рэкламна-інфармацыйнай, фінансава-гаспадарчай дзейнасці ў галіне міжнародных культурных сувязей.

Спецыяліст прадназначаны галоўным чынам для работы ў дзяржаўных органах кіравання культурай, установах культуры і мастацтва рознага профілю, навучальных установах розных узроўняў сістэмы Міністэрства культуры, навукова-метадычных цэнтрах народнай творчасці, цэнтрах нацыянальных культур, турысцка-экскурсійных прадпрыемствах, санаторна-курортных установах, сродках масавай інфармацыі, рэкламных агенцтвах, грамадскіх арганізацыях і аб’яднаннях.

Спецыяльнасць — сацыяльна-культурная дзейнасць. Спецыялізацыі — арганізацыя і методыка сацыяльна-культурнай дзейнасці ў культурна-адпачынкавых установах; арганізацыя і методыка сацыяльна-культурнай дзейнасці ў тэатральна-відовішчных установах; арганізацыя і методыка сацыяльна-культурнай дзейнасці ў санаторна-аздараўленчых і турысцка-спартыўных установах. Кваліфікацыя — спецыяліст па сацыяльна-культурнай дзейнасці. Выкладчык.

Дзейнасць спецыяліста накіравана на сацыяльна-педагагічнае, псіхолага-педагагічнае, інфармацыйнае, арганізацыйна-метадычнае ўздзеянне на развіццё асобы ў працэсе вытворчасці, інтэрпрытацыі, захавання і распаўсюджання культурных каштоўнасцей.

Спецыяліст прыстасаваны для працы ва ўстановах культурна-адпачынкавай сферы: клубы, палацы культуры, цэнтры вольнага часу, установы спорту і турызму, санаторна-аздараўленчыя ўстановы, цэнтры народнай творчасці, цэнтры эстэтычнага выхавання, цэнтры пазашкольнай работы, канцэртныя, выставачныя і кінавідовішчныя арганізацыі, гарадскія паркі і заапаркі на пасадах метадыста, культарганізатара, інструктара, загадчыка аддзела культурна-адпачынкавай дзейнасці. Выпускнікі могуць працаваць выкладчыкамі ў сярэднеспецыяльных навучальных установах культуры і мастацтва.

Спецыяльнасць – культуралогія. Спецыялізацыя – інфармацыйныя сістэмы ў культуры. Кваліфікацыя – культуролаг-менеджэр.

Менеджэр інфармацыйнай службы прызначаны для работы ва ўстановах культуры, навукі, асветы, вытворчасці, што маюць (або ствараюць) падраздзяленні, якія займаюцца апрацоўкай і захаваннем інфармацыі (у першую чаргу - у галіне культуры). Менеджэр інфармацыйнай установы абавязаны валодаць ведамі гуманітарных і дакладных навук, інфармацыйнымі тэхналогіямі, а таксама ведамі па арганізацыі і кіраванні інфармацыйнымі службамі.

Выпускнікі спецыялізацыі могуць працаваць кіраўнікамі інфармацыйных аддзелаў, камп'ютэрных цэнтраў, камп'ютэрных гульнёвых цэнтраў, цэнтраў дыстанцыйнага навучання пры установах культуры (клубах, музеях, тэатрах, канцэртных установах, цырках, тэатральна-відовішчных установах), у рэдакцыях сродкаў масавай інфармацыі, маркетынгавых і рэкламных аддзелах устаноў культуры, на радыё і тэлебачанні. Таксама яны могуць працаваць кіраўнікамі аддзелаў аўтаматызацыі бібліятэк, музеяў, выстаў, галерэй і інш.

Спецыяльнасць –культуралогія. Спецыялізацыя – сусветная i айчынная мастацкая культура. Кваліфікацыя – культуролаг-даследчык. Выкладчык.

Спецыяліст, які рыхтуецца па спецыяльнасці “Сусветная і айчынная мастацкая культура”, прызначаны да педагагічнай дзейнасці ў сярэдніх, сярэдніх спецыяльных навучальных установах, а таксама вышэйшых установах, у якіх выкладаецца інтэгрыраваны курс гісторыі нацыянальнай і сусветнай мастацкай культуры. Асноўнай функцыяй спецыяліста гэтага накірунку з’яўляецца выкладанне прадметаў эстэтычнага цыкла і эстэтычнае выхаванне моладзі ў працэсе навучання.

Спецыяльнасць – мастацтвазнаўства. Спецыялізацыя – кампаратыўнае мастацтвазнаўства. Кваліфікацыя – мастацтвазнавец. Выкладчык.

На спецыялізацыю “кампаратыўнае мастацтвазнаўства” могуць паступаць толькі выпускнікі сярэдніх спецыяльных навучальных устаноў у галіне мастацкай культуры (музычныя вучылішчы, каледжы, мастацкія вучылішчы, гімназіі азначанага профілю, вучылішчы мастацтваў).

Спецыяліст, які рыхтуецца па спецыяльнасці “Мастацтвазнаўства”, спецыялізацыі “Кампаратыўнае мастацтвазнаўства” прызначаны да мастацтвазнаўчай дзейнасці ва ўстановах культуры (музеях, філармоніях, тэатрах, кінатэатрах, цэнтрах культуры і інш.), а таксама сярэдніх спецыяльных і вышэйшых навучальных установах, дзе выкладаецца інтэгрыраваны курс гісторыі мастацтваў (музычнага, тэатральнага, выяўленчага, кіно), сусветнай мастацкай культуры.

Асноўнай функцыяй спецыяліста з’яўляецца дзейнасць у галіне тэарэтычнага і практычнага мастацтвазнаўства. Сумежнай функцыяй спецыяліста з’ўляецца выкладанне прадметаў мастацтвазнаўчага цыклу.

Спецыяльнасць – культуралогія. Спецыялізацыя – тэорыя і гісторыя культуры. Кваліфікацыя – культуролаг-даследчык. Выкладчык.

Спецыяліст прызначаны галоўным чынам для работы ў навучальных установах розных узроўняў Міністэрства культуры, Міністэрства адукацыі, дзяржаўных органах кіравання культурай, установах культуры рознага профілю, навукова-метадычных цэнтрах нацыянальных культур, вылічальных цэнтрах і лабараторыях у сферы культуры, сродках масавай інфармацыі, навукова-даследчых установах; грамадскіх арганізацыях і аб’яднаннях.

Усе спецыялізацыі карыстаюцца вялікай папулярнасцю ў абітурыентаў, таму традыцыйна высокі конкурс дазваляе штогод адбіраць найбольш таленавітую творчую моладзь, рыхтаваць яе да плённай працы ў галіне беларускай культуры.

На факультэце навучаюцца стыпендыяты Прэзідэнцкага фонду, пераможцы творчых конкурсаў і фестываляў. Вядзецца падрыхтоўка магістрантаў, аспірантаў і дактарантаў па трох спецыяльнасцях, працуюць саветы па абароне кандыдацкіх і доктарскіх дысертацый. Навучальны працэс забяспечваюць вядомыя спецыялісты і навукоўцы ў галіне культуры, мастацтва і сацыякультурнай дзейнасці.

Базамі практыкі з’яўляюцца лепшыя арганізацыі і ўстановы Беларусі: Палац Рэспублікі, Канцэртны зал “Мінск”, Нацыянальная Белтэлерадыёкампанія, “СТВ”, “Мір”, “Лад”, Нацыянальны мастацкі музей, Нацыянальная бібліятэка, санаторыі, падпарадкаваныя Упраўленню справамі Прэзідэнта РБ і інш.

Вынікі працаўладкавання выпускнікоў сведчаць аб вялікім попыце на спецыялістаў. Выпускнікі факультэта запатрабаваныя самымі разнастайнымі ўстановамі культуры: тэатрамі і клубнымі ўстановамі, цэнтрамі народнай творчасці і ўстановамі сацыяльнай абароны, вучылішчамі, школамі, органамі кіравання, канцэртнымі і фестывальнымі пляцоўкамі, мастацкімі галерэямі.

 Загадчык кафедры – кандыдат філасофскіх навук, дацэнт Языковіч Віктар Робертавіч.

Кафедра з'яўляецца вядомым адукацыйным, навуковым і навукова-метадычным цэнтрам ў галіне культуралогіі і філасофіі.

Кафедра з'яўляецца выпускаючай па спецыялізацыі "Тэорыя і гісторыя культуры" спецыяльнасці “Культуралогія” факультэта культуралогіі і СКД, а таксама факультэта завочнага навучання, ажыццяўляе падрыхтоўку студэнтаў усіх факультэтаў па культуралагічных кірунках, філасофіі, этыцы, эстэтыцы, сацыялогіі, эканамічнай тэорыі, паліталогіі, рэлігіязнаўству, ідэалогіі беларускай дзяржавы, асновах прыродазнаўства, прававых дысцыплінах, ахове працы, асновах медыцынскіх ведаў. 

Калектыў кафедры ажыццяўляе падрыхтоўку магістраў па культуралогіі, кандыдатаў і дактароў культуралогіі па спецыяльнасці 24.00.01 “Тэорыя і гісторыя культуры”. У апошнія гады былі абаронены звыш 20 кандыдацкіх і дзве доктарскія дысертацыі па тэорыі і гісторыі культуры.

На кафедры працуюць высокакваліфікаваныя выкладчыкі: рэктар універсітэта Барыс Уладзіміравіч Святлоў, першы прарэктар Юрый Паўлавіч Бондар, прарэктар па навуковай рабоце Марына Аляксандраўна Мажейка, Уладзімір Фёдаравіч Мартынаў, Ігар Вячаслававіч Марозаў, Энгельс Канстанцінавіч Дарашэвіч, Хасан Сабіравіч Гафараў, Аляксандр Івановіч Смолік, Руслан Васільевіч Грабеннікаў і іншыя.

Калектыў кафедры актыўна вядзе навуковую работу. У 2006-2010 гг. творчымі калектывамі кафедры выконваюцца дзве навуковыя тэмы: «Беларуская культура ва ўмовах глабалізацыі: кросс-культурнае узаемадзеянне і праблема захавання нацыянальнай ідэнтычнасці», “Міжкультурная камунікацыя ў сучасным глабальным свеце”.

За апошнія гады супрацоўнікамі кафедры падрыхтаваны шэраг навуковых манаграфій, шматлікія артыкулы, тэзісы, матэрыялы для зборнікаў, энцыклапедычных і ішных папулярных выданняў. Прафесарска-выкладчыцкі склад, аспіранты і дактаранты кафедры прымаюць актыўны ўдзел ў шматлікіх канферэнцыях, чытаннях, навуковых кангрэсах, семінарах.

Кафедра падтрымлівае цесныя сувязі сі навуковымі і навучальнымі установамі краіны. Сумесна з Інстытутам сацыялогіі, Інстытутам мастацтвазнаўства, этнаграфіі і фальклору НАН Беларусі, БДУ выконваюцца навуковыя работы, праводзяцца канферэнцыі і іншыя мерапрыемствы.

Кафедра беларускай і сусветнай мастацкай культуры
220001, г.Мінск, вул.Рабкораўская, 17, пакой 722, тэл. 222 83 59

Загадчык – доктар мастацтвазнаўства, прафесар Пракапцова Вера Паўлаўна

Кафедра рыхтуе спецыялістаў-мастацтвазнаўцаў па дзвюх спецыялізацыях: “сусветная і айчынная мастацкая культура” і ”кампаратыўнае мастацтвазнаўства”. Спецыялізацыя “кампаратыўнае мастацтвазнаўства” не мае аналагаў у Рэспубліцы Беларусь. Студэнтам прапануюць шырокае кола ведаў, шэраг вучэбных дысцыплін з’яўляюцца эсклюзіўнымі.

За апошнія гады выкладчыкамі кафедры было апублікавана 5 манаграфій, 7 вучэбных дапаможнікаў, каля 20 вучэбных праграм, больш за 300 навуковых і публіцыстычных артыкулаў. Супрацоўнікі і студэнты кафедры пастаянна прымаюць актыўны ўдзел у рабоце навуковых міжнародных і рэспубліканскіх канферэнцыях.

Кафедра здзяйсняе набор у магістратуру і аспірантуру па спецыяльнасці “Тэорыя і гісторыя мастацтва”. На кафедры ўсталяваўся трывалы кантакт з універсітэтам Хуанхэ ў г.Чэньджоў (Кітайская народная рэспубліка). На кафедры навучаюцца магістранты і аспіранты з КНР.

У 1996 г. пры кафедры адкрыты магістратура па спецыяльнасці “мастацтва” і аспірантура па спецыяльнасці “тэорыя і гісторыя мастацтва”. Навуковая праблематыка магістэрскіх і аспіранцкіх даследаванняў ахоплівае пытанні гісторыі і тэорыі развіцця мастацкай культуры ў Беларусі, асобных відаў мастацтва, кампаратыўнага аналізу іх узаемадзеяння, пытанні фарміравання жанраў, семіётыкі і семантыкі твораў мастацтва і інш.

Выкладчыцкі склад кафедры прадстаўлены сучаснымі вядучымі навукоўцамі, якія працуюць у розных галінах мастацтва. На кафедры працуюць – доктар мастацтвазнаўства, прафесар В.П.Пракапцова; кандыдат мастацтвазнаўства, прафесар Г.В.Ратнікаў; кандыдат мастацтвазнаўства, дацэнт Н.А.Агафонава; кандыдат педагагічных навук, дацэнт А.М.Пацыенка; кандыдат мастацтвазнаўства, дацэнт Н.Д.Піскун; кандыдат мастацтвазнаўства, дацэнт А.Я.Корсакова; кандыдат мастацтвазнаўства, дацэнт Л.А.Густова-Рунцо; кандыдат мастацтвазнаўства, старэйшы выкладчык С.Ю.Смульская; кандыдат мастацтвазнаўства, выкладчык Т.М.Бабіч; старэйшы выкладчык Емялёва А.М., старэйшы выкладчык – Л.В.Ізмаілава, выкладчыкі А.М.Нікіфарэнка, А.В.Няборская, Л.А.Старцава.

Загадчык кафедры – кандыдат педагагічных навук, прафесар Казлоўская Людміла Іванаўна

Кафедра з'яўляецца вядомым у рэспубліцы адукацыйным, навуковым, і навукова-метадычным цэнтрам у галіне сацыякультурнай дзейнасці.

Кафедра з'яўляецца выпускаючай па спецыяльнасцях "Сацыяльная педагогіка" і "Сацыяльная работа", а з 2008-2009 навучальнага года і па спецыяльнасці "Сацыяльна-культурная дзейнасць" са спецыялізацыямі: "Арганізацыя і методыка сацыяльна-культурнай дзейнасці ў культурна-адпачынкавых установах", "Арганізацыя і методыка сацыяльна-культурнай дзейнасці у тэатральна-відовішчных установах, "Арганізацыя і методыка сацыяльна-культурнай дзейнасці ў санаторна-аздараўленчых і турысцка-спартыўных установах".

Калектыў кафедры ажыццяўляе падрыхтоўку магістраў і аспірантаў па спецыяльнасці 13.00.05 – Тэорыя, методыка і арганізацыя сацыяльна-культурнай дзейнасці. У апошнія гады былі абаронены каля 20 кандыдацкіх і 1 доктарская дысертацыі па сацыякультурнай дзейнасці.

Выпускнікі кафедры з'яўляюцца кваліфікаванымі спецыялістамі, кіруюць установамі культуры розных узроўняў, працуюць тэле- і радыё- вядучымі, навуковымі супрацоўнікамі вышэйшых устаноў рэспублікі.

На кафедры працуюць высокакваліфікаваныя спецыялісты: кандыдаты навук, дацэнты Бірукова Тамара Палікарпаўна, Савіна Валянціна Філіпаўна, Мышкавец Аліна Анатольеўна, Рагачова Вольга Уладзіміраўна, Сенько Вера Рыгораўна, Рабава Алена Віктараўна, а таксама вядомыя ў рэспубліцы спецыялісты у галіне культуры, старшыя выкладчыкі Гуд Ніна Іванаўна, Байко Анжаліка Пятроўна.

Калектыў кафедры актыўна вядзе навуковую работу. У 2006-2010 гг. вядзецца распрацоўка тэмы " Развіццё творчых здольнасцей асобы сродкамі сацыякультурнай дзейнасці". За апошнія гады падрыхтаваны шэраг навуковых артыкулаў, тэзісаў, матэрыялаў навуковых канферэнцый, матэрыялаў для спецыяльных часопісаў.

Кафедра падтрымлівае цесныя сувязі з навуковымі і навучальнымі установамі краіны і бліжняга замежжа.

На кафедры існуе навуковая школа па праблемах сацыякультурнай дзейнасці пад кіраўніцтвам доктара педагагічных навук, прафесара Грыгаровіч Ядвігі Дамінікаўны, навуковы студэнцкі гурток "Пошук".

Кафедра распрацоўвае і ажыццяўляе інавацыйныя творчыя праекты для розных сацыякультурных і адукацыйных устаноў рэспублікі, беларускага тэлебачання. Напрыклад, пад кіраўніцтвам выкладчыкаў кафедры былі створаны сацыякультурныя праекты па сацыяльнаму заказу аздараўленчага цэнтра "Юнацтва", Лошыцкага сядзібна-паркавага комплексу, праект "Адраджэнне" для Дома культуры вёскі Лучнікі Мінскага раёна і шмат іншых. Сярод апошніх творчых работ, падрыхтаваных выкладчыкамі, магістрамі і студэнтамі кафедры, такія як: "Містэр Універсітэт", конкурсная праграма "Дзіва" для маладых выкладчыкаў універсітэта, шэраг святочных канцэртаў для супрацоўнікаў універсітэта. Штогод студэнтамі, магістрамі і выкладчыкамі кафедры ажыццяўляецца распрацоўка і пастаноўка больш за 100 культурна-адпачынкавых праектаў.

Студэнты кафедры актыўна прымаюць удзел у Міжнародным фестывалі гульні "Гуляюць дзеці – гуляем мы" і з'яўляюцца яго лаўрэатамі і дыпламантамі, працуе студэнцкі тэатр "Вуліца", пастаноўкі якога ажыццяўляліся на розных пляцоўках г.Мінска. Валанцёрскі студэнцкі атрад "СЛОН" ажыццяўляе дапамогу дзіцячым дамам, цэнтрам рэабілітацыі, ветэранам вайны па арганізацыі сацыяльна-культурнай дзейнасці; працуе студэнцкі клуб "7 – Я".

Кафедра менеджменту сацыяльнай і культурнай дзейнасці
220001, г.Мінск, вул. Рабкораўская, 17, пакой 608, тэл.222 80 25

Кафедра менеджменту СКД з пачатку функцыянавання (1993 г.) скіравана на падрыхтоўку спецыялістаў для устаноў і арганізацый культуры, здольных ажыццяўляць кіраванне сучаснымі культурнымі працэсамі, валодаць неабходнымі ведамі і ўменнямі, уплываць на характар функцыянавання розных сацыяльна-культурных інстытутаў.

Навучанне ажыцяўляецца па двух спецыялізацыях: менеджмент сацыяльнай і культурнай сферы, менеджмент міжнародных культурных сувязей.

Будучыя спецыялiсты рыхтуюцца да арганізацыйна-кіраўнічай, інавацыйна-метадычнай, камерцыйнай, маркетынгавай, навукова-даследчай, педагагічнай, праектна-аналiтычнай, рэкламна-інфармацыйнай, фінансава-гаспадарчай дзейнасцi ў галiне культуры. Студэнты атрымоўваюць у адпаведнасці з дзяржаўнымі стандартамі належны ўзровень сацыяльна-гуманiтарных, агульнанавуковых, агульнапрафесiйных i спецыяльных ведаў, практычных навыкаў, што дазваляе ім пасля прысваення адпаведнай квалiфiкацыi паспяхова ажыццяўляць актыўную прафесiйную дзейнасць.

Студэнты актыўна прымаюць удзел у разнастайных праграмах, якія рэалізуюцца ва універсітэце і за яго межамі. Сярод іх вызначаецца творчы праект “Сваё кола”, скіраваны на падагульненне прафесійных ведаў і раскрыццё асабістых творчых магчымасцей студэнтаў кафедры.

У кафедры склаліся добрыя, трывалыя сувязі з адукацыйнымі ўстановамі ў галіне падрыхтоўкі менеджэраў сацыяльна-культурнай сферы краін далёкага і блізкага замежжа. Актыўна ажыццяўляюцца міжнародныя кантакты кафедры менеджменту з Санкт-Пецярбургскім дзяржаўным універсітэтам культуры і мастацтваў, Кіеўскім нацыянальным універсітэтам культуры і мастацтваў, Маскоўскім дзяржаўным універсітэтам культуры і мастацтваў.

Пасля заканчэння універсітэту спецыялiсты змогуць працаваць галоўным чынам у дзяржаўных органах кіравання культурай, установах культуры і мастацтва рознага профілю, навучальных установах розных узроўняў сістэмы Міністэрства культуры, Міністэрства адукацыі, пазашкольных установах, навукова-метадычных цэнтрах народнай творчасцi, цэнтрах нацыянальных культур, вылічальных цэнтрах і лабараторыях у сферы культуры і мастацтва, турысцка­экскурсійных прадпрыемствах, санаторна­курортных установах, сродках масавай інфармацыі, рэкламных агенцтвах, навукова-даследчых установах, грамадскiх арганізацыях і аб’яднаннях.

Кафедра пачала сваю дзейнасць у 1995. Яна рыхтуе высокакваліфікаваных спецыялістаў для галіны інфармацыйных тэхналогій, кампетэнтных у тэхналагічных і сацыякультурных працэсах. Разам з глыбокім вывучэннем культуралагічных дысцыплін і асноў менеджменту студэнты атрымоўваюць веды ў галіне дакладных навук і прафесійна авалодваюць камп’ютэрнымі тэхналогіямі.

Выкладчыкі і студэнты кафедры прымаюць актыўны удзел у рэспубліканскіх і міжнародных навуковых і метадычных канферэнцыях. Кафедра вядзе асобную секцыю “Культура і Інтэрнет” на рэспубліканскай канферэнцыі “Інтэрнет у Беларусі – by-net”.

Выпускнікі кафедры працуюць ва ўстановах культуры і мастацтва РБ, сярод іх: Я.Лашкоўскі – дыктар і вядучы канала ОНТ, В.Парахневіч – начальнік вытворчасці прадпрыемства “Ліцейны двор”, Я.Зельскі – галоўны спецыяліст “Аховы” (сістэмы бяспекі) і многія іншыя.