«Новыя кнігі: па старонках беларускага друку»

23 снежня 2020 года ў Нацыянальнай бібліятэцы Беларусі адбылася ўрачыстая імпрэза з нагоды 60-годдзя бібліяграфічнага бюлетэня «Новыя кнігі: па старонках беларускага друку». Праз адно са старэйшых рэкамендацыйна-бібліяграфічных выданняў у сучасным свеце Нацыянальная бібліятэка Беларусі штомесяц прадстаўляе лепшую частку дакументнага патоку Беларусі, прапануе актуальную і цікавую тэматыку чытання, змястоўныя матэрыялы да значных юбілейных падзей. Асаблівая ўвага ў выданні надаецца бібліяграфічнаму адлюстраванню ведаў аб Беларусі. Бюлетэнь стаў каштоўнай крыніцай інфармацыі для аматараў чытання, студэнтаў, спецыялістаў, аб чым сведчыць яго запатрабаванасць: за апошнія 14 гадоў у Нацыянальнай бібліятэцы Беларусі ён выдаваўся чытачам амаль кожны дзень.

На мерапрыемстве было прэзентавана новае выданне «Беларусь вачыма бібліёграфа», створанае на падставе лепшых інфармацыйна-аналітычных матэрыялаў беларусазнаўчай тэматыкі з «Новых кніг…». У 32-х тэматычных раздзелах гэтай прыгожай кнігі прадстаўлены творчыя замалёўкі бібліёграфаў пра нашу краіну. Выданне аздоблена выявамі разнастайных аб’ектаў, вокладак і старонак асобных дакументаў з фондаў Нацыянальнай бібліятэкі Беларусі.

На імпрэзе ад факультэта інфармацыйна-дакументных камунікацый Беларускага дзяржаўнага ўніверсітэта культуры і мастацтваў выступіла прафесар кафедры бібліятэчна-інфармацыйнай дзейнасці Саітава В.І. Яна акцэнтавала ўвагу на ролі «Новых кніг…» як цэнтральнага ўніверсальнага рэсурса беларускай рэкамендацыйнай бібліяграфіі і яго выкарыстанні ў практыка-арыентаваным навучанні студэнтаў факультэта. Выданне «Беларусь вачыма бібліёграфа» стала каштоўным падарункам Нацыянальнай бібліятэкі Беларусі факультэту.