«Трансфармацыя народнай аграрнай абраднасці ў саломапляценні Беларусі. Жніўныя ўпрыгожванні»

Запрашаем 27 кастрычніка 2020 г. ў мастацкую галерэю «Універсітэт культуры» (Палац Рэспублікі). А 17-й гадзіне адбудзецца лекцыя-прэзентацыя і дэманстрацыйны майстар-клас мастака Шаціло Алены Віктараўны «Трансфармацыя народнай аграрнай абраднасці ў саломапляценні Беларусі. Жніўныя ўпрыгожванні». Алена Віктараўна — старшы выкладчык кафедры народнага дэкаратыўна-прыкладнога мастацтва Беларускага дзяржаўнага ўніверсітэта культуры і мастацтваў.

Падчас лекцыі Алена Віктараўна падзеліцца ведамі пра міфалагічныя карані мастацтва саломапляцення, прааналізуе міфалагічны аспект мыслення чалавека, асаблівасці ўжывання саломы злакавых раслін у традыцыйнай жніўнай абраднасці і іх трансфармацыю ў сучасным мастацкім асяроддзі, пакажа асноўныя прынцыпы і формы саламяных абрадавых атрыбутаў, а таксама прадэманструе працэс стварэння традыцыйных жніўных упрыгожанняў.

Таксама гасцей чакае выступленне калектыву «Этнасуполка» кафедры этналогіі і фальклору пад кіраўніцтвам Таццяны Пладуновай. Калектыў выканае абрадавыя песні.

Мерапрыемства адбудзецца ў рамках юбілейнага праекта «Прыгажосць і суладдзе», які экспануецца ў галерэі і прымеркаваны да 45-годдзя Беларускага дзяржаўнага ўніверсітэта культуры і мастацтваў.