Праект Хэдлайнер – гэта пра нас!

9 красавіка ў рамках фестывалю творчасці Хэдлайнер (БДУКМ) пачаўся тыдзень канцэрт-холаў. У гэты дзень з 12.30 да 13.00 у фае першага паверха галоўнага корпуса мы пабачылі першы канцэрт-хол. Яго арганізаваў прадзюсарскі цэнтр INTEGRE CENTRE студэнткі 3 курса кафедры рэжысуры абрадаў і свят Ніколь Літвінчук (Салашэнка) – адной з пяці ўдзельнікаў фестывалю творчасці Хэдлайнер.

“Нашы артысты не прафесіяналы, – гаворыць Ніколь, – а неардынарныя людзі з добрымі здольнасцямі, яны танчаць, спяваюць, думаюць, гавораць і ўсё гэта ад душы! Мы - сапраўдныя, не пастэрызаваныя, не рафінаваныя, не дыстыляваныя і не прафільтраваныя грамадскай думкай!

Прадзюсарскі цэнтр у асобе рэжысёра, харэографа, менеджэра, – працягвае Ніколь, – дае добры старт нашым артыстам. Мы падтрымліваем іх творчасць, даем магчымасць выйсці на сцэну, дапамагаем атрымаць незабыўныя ўражанні, заявіць пра сябе і, магчыма, стаць новым імем у сценах любімага ўніверсітэта!”

З Ніколь Літвінчук (Салашэнка) працуюць студэнты розных курсаў кафедры рэжысуры абрадаў і свят Лера Салаўёва, Арцём Шандзер, Ігар Крывулька. А Яна Калачынская, Іван Клешчанка, Вікторыя Еўстратоўская, Сняжана Ахрыменя, Дзяніс Клясуноў і Ангеліна Кароткая, таксама будучыя рэжысёры, складаюць аргакмітэт Хэдлайнера.

Чакаем канцэрты наступных удзельнікаў!