International Folklore Festival «Baltica 2015»

Амаль 30 гадоў (з 1987) краіны Балтыі штогод (па чарзе: Эстонія, Латвія, Літва) ладзяць адзін з найбольш вядомых ва ўсходняй Еўропе фальклорных фестываляў – «Baltica». Асноўныя ўдзельнікі фэсту – прыбалтыйскія аўтэнтычныя і маладзёжныя фальклорныя калектывы, але ў абавязковай «гасцявой» праграме штогод – гурты з Нарвегіі, Ірландыі, Расіі, Грузіі, Польшчы, Украіны, Партугаліі – еўрапейскіх краін, дзе захаваліся «выспы» аўтэнтыкі і вядзецца паспяховая праца па перадачы яе спадчыны моладзі.

Улетку 2015 года ў Латвіі адбыўся чарговы International Folklore Festival «Baltica 2015» (ужо дзясяты менавіта на латышскай зямлі), прадставіць каранёвую этнічную музыку нашай Радзімы на якім аргкамітэт запрасіў фальклорны ансамбль «TAЛАКА» кафедра этналогіі і фальклору Беларускага дзяржаўнага ўніверсітэта культуры і мастацтваў.

Акрамя масавых «стадыённых» канцэртаў (напрыклад, на ўрачыстым адкрыцці фэсту, які сёлета вітаў сам прэзідэнт Латвіі Райманд Веёніс ў поўным нацыянальным этнаграфічным строі, прысутнічала каля 7 000 гледачоў) у праграме «Baltica 2015» – шмат майстар-класаў, «камерных» канцэртаў у латышскай «глыбінцы» – рэгіёнах Латгаліі, Відземе, Курземе, Земгаліі, вечарын побытавага танца, спевак і сумесных фальклорных «джэмаў» з латышскімі фалькларыстамі, якія асабліва цэняць непасрэднасць і незаарганізаванасць «жывога» пераймання культурнай спадчыны кожнага народа. Для захавання фальклору ў Латвіі створана сістэма танцавальных клубаў, дамоў рамёстваў і этнаграфічных музеяў, як і ў савецкія часы штогод праводзіцца агульнанацыянальнае свята песні, ёсць нават спецыялізаваныя «фальклорныя» пабы і кавярні ў заснаванай у 1201 годзе прыгажуні-Рызе і іншых гарадах.

Фальклор Беларусі (а беларусы складаюць трэцюю па колькасці пасля латышоў і рускіх дыяспару Латвіі – каля 3,4% яе жыхароў) у рэпрэзентацыі «TAЛАКІ» (з дударскай музыкай, набліжанымі да аўтэнтычных спевамі і побытавымі танцамі з калекцыі этнахарэолага Міколы Козенкі) прыйшоўся арганізатарам і гасцям фэсту да спадобы. Міністр культуры Латвійскай Рэспублікі спадарыня Дацы Мелбардзе ўручыла беларускім гасцям дыплом-падзяку, а Латвійскае тэлебачанне ўключыла выступы студэнтаў-фалькларыстаў БДУКМ у тэлеканцэрты-справаздачы пра гала-канцэрт замежных гасцей фестывалю (https://www.youtube.com/watch?v=paK6T0BTh84) і пра закрыццё «Baltica-2015» (https://www.youtube.com/watch?v=fjAWTcxfElA), памясціла іх і ў фестывальны інтэрнэт-архіў. Як заўжды аператыўна, неперадузята і шчыра падзею асвятліла штотыднёвая газета «Літаратура і мастацтва» (№ 29, старонка 2, http://www.main.lim.by/wp-content/uploads/2015/07/29-2015.pdf), а адзін з яе рэдактароў журналіст Марына Весялуха падзялілася з удзельнікамі адфесціваліўшай «TAЛАКІ» прыведзенымі ніжэй фатаздымкамі.