Выстава мастацкага тэкстылю Марыі Барысенка “BLUES”

13 лютага 2015 года ў 17.00 пад гукі жывой музыкі ў выкананні Юрыя Несцярэнкі і групы “White Night Blues” у мастацкай галерэі "Універсітэт культуры" адкрыецца выстава мастацкага тэкстылю Марыі Барысенка “BLUES”.

Музыка, як з’ява, якая не мае межаў і не падуладна часу – адначасова і дэмакратычны, і элітарны, і найбольш абстрактны з відаў мастацтва – з‘яўляецца бясконцай крыніцай натхнення для маладога аўтара.

Прадстаўленая на выставе серыя прац – гэта чарговая спроба Марыі Барысенка знайсці ўласнае пластычнае выражэнне музыкі і эмоцый, якія ўзнікаюць пад яе ўплывам. Эмацыянальнае напружанне і сіла ўздзеяння твораў узмацняюцца ўжываннем нетрадыцыйных матэрыялаў. Выкарыстоўваючы светадыёдную падсветку і іншыя нетрадыцыйныя матэрыялы – фальгу, дрот, аўтар павышае візуальны эфект, ад якога змяняецца ўспрыманне прасторы – здаецца, творы нібы вісяць у паветры. Тым больш, што частка прац дэманструецца ў цемры.

Выстава “BLUES” – гэта ўжо трэці праект Марыі Барысенка на музычную тэму і своеасаблівы працяг серыі з дзвюх папярэдніх выстаў эксперыментальнага тэкстылю “JAZZ” і “BEATLES forever!”, што былі раней з поспехам праэкспанаваны ў галерэі. У межах выставы будуць трансліравацца фільмы з унікальнага праекту Марціна Скарсэзэ “Блюз” – адной з самых уражлівых дакументальных серый апошніх дзесяцігоддзяў ХХ ст.

Марыя Барысенка – у былым выпускніца, а ў цяперашні час выкладчык кафедры народнага дэкаратыўна-прыкладнога мастацтва Беларускага дзяржаўнага ўніверсітэта культуры і мастацтваў, стыпендыят спецыяльнага фонду Прэзідэнта Рэспублікі Беларусь па падтрымцы таленавітай моладзі, пераможца Рэспубліканскай выставы-конкурсу “Час не стаіць і не чакае ...” у намінацыі “Тканіны. Габелен. Мадэліраванне”. Удзельнік шматлікіх рэспубліканскіх, міжнародных і замежных выстаў.

Працы маладой мастачкі знаходзяцца ў Нацыянальным мастацкім музеі Рэспублікі Беларусь, дзяржаўных і прыватных калекцыях Беларусі, Расіі і Венесуэлы.

Выстава будзе працаваць з 13 лютага па 21 сакавіка 2015 года.
Наш адрас: мастацкая галерэя “Універсітэт культуры”, Кастрычніцкая пл.,1 (Палац Рэспублікі).
Тэл.: 327-26-12.
Мы працуем: 11.00-19.00.
Выхадныя: нядзеля, панядзелак.
Уваход вольны.