Пропустить контент

Кнігі памятаюць

Posted in Новости

3 верасня 2012 г. споўнілася б 85 гадоў выдатнаму беларускаму пісьменніку Алесю Адамовічу. Пры жыцці ён не аднаразова наведваў наш універсітэт. Творчыя сустрэчы з ім заўсёды выклікалі цікавасць і збіралі поўныя аўдыторыі студэнтаў, выкладчыкаў і супрацоўнікаў. Сустрэчы з А. Адамовічам ладзіў загадчык кафедры літаратуры, прафесар, выдатны літаратуразнавец Мікола Грынчык. Яны сябравалі. Аб’ядноўвала іх не толькі агульная справа, але і тыя выпрабаванні, што выпалі на іх долю. Абодва ўдзельнічалі ў партызанскай барацьбе супраць фашысцкіх захопнікаў. Пра іх сяброўства расказаць ўжо няма каму. М. Грынчыка таксама няма з намі, але кнігі з аўтографамі Алеся Адамовіча, што некалі падараваў ён М. Грынчыку, раскажуць пра многае.

Кніжная выстава “Аўтографы расказваюць: дароўчыя надпісы Алеся Адамовіча прафесару М. Грынчыку” экспануецца ў чытальнай зале бібліятэкі. Яна складаецца з трох раздзелаў: першы прысвечаны жыццю і творчаму шляху Алеся Адамовіча, у другім прадстаўлены кнігі з дароўчымі надпісамі А. Адамовіча М. Грынчыку з прыватнай бібліятэкі прафесара, падараванай яго сям’ёй бібліятэцы БДУКМ у 2000 г. Трэці раздзел распавядае пра М. Грынчыка і яго кнігазбор.

Выставу ўпрыгожваюць фотаздымкі з фонда фотадакументаў па гісторыі БДУКМ, якія захоўваюцца ў аддзеле рэдкіх кніг і дакументаў бібліятэкі. На унікальных рэдкіх здымках можна бачыць А. Адамовіча і М. Грынчыка сярод супрацоўнікаў Інстытута літаратуры АН БССР, М. Грынчыка з унукам Льва Талстога Мікітам Талстым і іншыя, а таксама сямейныя фотаздымкі А. Адамовіча.

Сардэчна запрашаем пазнаёміцца з выставай.