Навукова-даследчая работа выкладчыкаў і студэнтаў

У БДУ культуры і мастацтваў навуковая работа студэнтаў пачынаецца ў агульнауніверсітэцкіх, факультэцкіх навуковых гуртках, у гуртках, створаных на кафедрах. Да першых з іх адносіцца навуковае аб’яднанне “Studia-humanitatis”, якое ў 2002 г. за актыўную навуковую дзейнасць атрымала прэмію Спецыяльнага фонду Прэзідэнта РБ па сацыяльнай падтрымцы адораных навучэнцаў і студэнтаў і на сродкі якога быў выдадзены зборнік студэнцкіх творчых работ “Альфабэт”. Да агульнауніверсітэцкіх адносіцца і суполка “БУКет”, праца якой адлюстроўваецца ў рэгулярным выпуску зборнікаў твораў студэнтаў – удзельнікаў суполкі.

Як важнейшы этап у падвядзенні вынікаў студэнцкай навуковай работы з’яўляюцца штогадовыя навуковыя канферэнцыі студэнтаў, магістрантаў і аспірантаў. Яны адбываюцца ў красавіку і прысвечаны праблемам беларускай культуры. Падчас пленарнага пасяджэння і работы секцый заслухоўваюцца студэнцкія даклады, а з іх лепшыя адбіраюцца для дэпаніравання. Гэта дазваляе звярнуць увагу на найбольш здольных студэнтаў і скіраваць іх навуковыя спробы на свядомую навуковую працу.

Завяршэннем гадавога цыкла студэнцкай навуковай дзейнасці з’яўляецца ўдзел лепшых студэнцкіх навуковых работ у штогадовым рэспубліканскім конкурсе.

Навуковыя кірункі, развіццё якіх забяспечваецца калектывам універсітэта, з’яўляюцца прыярытэтнымі ў галіне культуры. Асабліва важнае значэнне набываюць праблемы, звязаныя з функцыяніраваннем сацыякультурнай сферы. Сярод галоўных задач, што вырашаюцца навукоўцамі універсітэта, можна вылучыць пытанні арганізацыі, метадычнага забеспячэння сацыяльна-культурнай дзейнасці ва ўстановах гэтай сферы – Дамах культуры, бібліятэках, музеях, аматарскіх творчых аб’яднаннях і інш. Ва універсітэце працуюць вядучыя вучоныя рэспублікі ў гэтай галіне. У склад навуковай школы ў галіне ўваходзяць аўтарытэтныя спецыялісты сацыякультурнай сферы.

Адзіная ў рэспубліцы школа ў галіне культуралогіі таксама сфарміравалася ва універсітэце. Яе стваральнікам з’яўляецца першы доктар культуралогіі прафесар А.І.Смолік.

Праблемамі кампаратывістыкі ў мастацтвазнаўстве займаецца навуковая школа, кіраўніком якой з’яўляецца доктар мастацтвазнаўства, прафесар В.П.Пракапцова.

Навуковую школу ў галіне бібліятэказнаўства і бібліяграфазнаўства ўзначальвае доктар педагагічных навук прафесар В.Е.Лявончыкаў. Яна з’яўляецца адзінай у рэспубліцы.

Наяўнасць навуковых школ, якія займаюць вядучае месца ў сферы культуры, дапамагае актыўнай і глыбокай распрацоўцы праблемных пытанняў, якаснаму кіраўніцтву падрыхтоўкай маладых кадраў, павышэнню навуковага статусу БДУ культуры і мастацтваў.

Своеасаблівай ілюстрацыяй навуковых дасягненняў універсітэта з’яўля­ецца навукова-метадычны часопіс “Веснік Беларускага дзяржаўнага універ­сітэта культуры і мастацтваў”, які выдаецца з 2002 г. Кожны нумар складаецца з артыкулаў вядомых навукоўцаў універсітэта, дактарантаў, аспірантаў, прысвечаных важнейшым праблемам у межах навуковых кірункаў універсітэта.

Своеасаблівым прызнаннем навуковага аўтарытэту універсітэта з’яўляецца супрацоўніцтва з навучальнымі і навуковымі ўстановамі і арганізацыямі рэспублікі і замежжа. Шырока ажыццяўлялася навуковае супрацоўніцтва з буйнымі навуковымі інфармацыйнымі і культурнымі цэнтрамі краіны, такімі як Інстытут мастацтвазнаўства, этналогіі і фальклору імя К.Крапівы, Інстытут гісторыі Нацыянальнай акадэміі навук Беларусі, Нацыянальны навукова-асветны цэнтр імя Ф. Скарыны, Беларускі дзяржаўны інстытут праблем культуры, Беларускі дзяржаўны педагагічны універсітэт імя М.Танка, Акадэмія паслядыпломнай адукацыі, Беларуская акадэмія музыкі, Нацыянальная бібліятэка Беларусі, а таксама з замежнымі вышэйшымі навучальнымі ўстановамі і арганізацыямі Расіі, Украіны, Літвы, ЗША, Германіі, Польшчы, Карэі, Францыі, Даніі, Англіі і інш.

Дактары навук, прафесары У.Ф.Мартынаў, Э.К.Дарашэвіч, В.П.Пракапцова, М.А.Мажэйка, М.А.Бяспалая, А.У.Марозаў, Ю.М.Чурко, дацэнт Л.Ф.Голікава з’яўляліся членамі экспертных саветаў па культуралогіі, мастацтвазнаўстве, філасофскіх, гіста­рычных і філалагічных навуках.

Прызнаннем высокага навуковага патэнцыялу калектыву універсітэта з’яўляецца ўдзел нашых навукоўцаў у выкананні трох заданняў у рамках Дзяржаўнай праграмы “Развіццё і функцыянаванне культуры Беларусі”, заданняў у межах рэалізацыі Канцэпцыі нацыянальнай бяспекі РБ і Дзяржаўнай праграмы інфарматызацыі РБ.

На падставе Пратакола даручэнняў Прэзідэнта РБ у БДУ культуры і мастацтваў створаны і актыўна працуюць дзве навукова-творчыя лабараторыі – беларускіх народных музычных інструментаў і традыцыйныя рамёствы беларусаў.