Бібліятэка

Бібліятэка Беларускага дзяржаўнага універсітэта культуры і мастацтваў была заснавана ў 1975 годзе. Агульная плошча – 900 кв.м.

Фонд бібліятэкі налічвае каля 600 000 адзінак айчынных і замежных дакументаў, нотных і перыядычных выданняў на беларускай, рускай, англійскай, нямецкай і іншых мовах. Пераважае літаратура па профілі універсітэта: культуралогія і гісторыя культуры, мастацтвазнаўства, сацыякультурная дзейнасць, народная самадзейная творчасць і мастацкія рамёствы, бібліятэказнаўства і бібліяграфазнаўства, сацыяльная педагогіка і псіхалогія, музеязнаўства, мастацкая літаратура і інш. Бібліятэкай сабраны і захоўваюцца звыш 5 тысяч старадрукаваных і рэдкіх выданняў, кнігазбораў з прыватных бібліятэк вядомых дзеячоў культуры Беларусі. Большасць з іх уяўляюць сабой гістарычную і бібліяграфічную каштоўнасць як выдатныя помнікі беларускай і сусветнай культуры. Асобнае месца займае літаратура па выяўленчым мастацтве, у тым ліку унікальныя альбомы рэпрадукцый вядомых мастакоў і мастацкіх музеяў свету. Фонд нотна-музычных выданняў налічвае каля 50 000 адзінак.

Паслугамі бібліятэкі карыстаюцца больш за 6 тысяч чытачоў. Штодзень бібліятэку наведваюць каля тысячы карыстальнікаў. Гэта студэнты шасці факультэтаў, магістранты, аспіранты, выкладчыкі, супрацоўнікі універсітэта.

Лакальная камп’ютэрная сетка інтэгравана ў карпаратыўную сетку універсітэта і прадстаўляе магчымасць карыстацца электроннымі рэсурсамі з любога аўтаматызаванага працоўнага месца.

Асаблівую ўвагу бібліятэка надае фарміраванню электронных рэсурсаў. Электронны каталог бібліятэкі пачаў стварацца ў 1993 годзе і налічвае звыш 50 000 запісаў. Электронныя базы даных ствараюцца па актуальных напрамках дзейнасці універсітэта (“Працы выкладчыкаўБДУ культуры і мастацтваў”, “Праблемы вышэйшай школы”, “Бібліятэчная справа і бібліяграфія” і інш.) і налічваюць каля 30 000 запісаў

Калекцыя мультымедыйных баз даных на CD-, DVD-ROM складае больш за 200 адзінак, музычных CD- больш за 300. Ствараецца электронная бібліятэка паўнатэкставых адукацыйных і навуковых рэсурсаў. Бібліятэка прадстаўляе сваім карыстальнікам вольны доступ да рэсурсаў Internet.

Бібліятэка вядзе вялікую навукова-бібліяграфічную дзейнасць. З 1993 года выдаецца серыя бібліяграфічных паказальнікаў, прысвечаная вядомым дзеячам навукі і культуры Беларусі – вучоным БДУ культуры і мастацтваў. Супрацоўнікі бібліятэкі займаюцца навуковымі даследваннямі ў галіне кніжнай культуры Беларусі. Бібліятэкай БДУ культуры і мастацтваў праводзіцца шмат міжнародных навукова-практычных семінараў, круглых сталоў, канферэнцый, адна з якіх – Міжнародныя Кірыла-Мяфодзіеўскія чытанні (да свята славянскага пісьменства і культуры).

Творчы калектыў бібліятэкі вядзе шырокую асветніцкую работу – арганізоўвае прэзентацыі кніг, сустрэчы з вядомымі дзеячамі літаратуры і мастацтва Беларусі, тэматычныя інфармацыйныя выставы і прагляды літаратуры, вернісажы, выставы твораў мастацтва.

Безумоўным прыярытэтам у рабоце бібліятэкі з’яўляецца арыентацыя на інфармацыйнае суправаджэнне навучальнага працэсу, навукова-даследчай і кіраўніцкай дзейнасці, на інфармацыйную падтрымку выхаваўчай работы.