Гісторыя універсітэта

Беларускі дзяржаўны універсітэт культуры і мастацтваў створаны на базе Мінскага інстытута культуры, які пачаў дзейнічаць з 1975 г. у адпаведнасці з Пастановай Савета Міністраў БССР ад 04.05.1975 г. №139 і загадам Міністэрства вышэйшай і сярэдняй спецыяльнай адукацыі БССР ад 14.05.1975 № 234.

У 1975 годзе сярод прыватных домікаў, вузенькіх вуліц, садоў і агародаў на месцы былой сажалкі паўстаў сучасны 8-павярховы будынак. Менавіта 1 верасня 1975 года ў адпаведнасці з Пастановай Савета Міністраў БССР на базе бібліятэчнага факультэта Мінскага дзяржаўнага педагагічнага інстытута імя А.М.Горкага і аддзялення культурна-асветніцкай работы Беларускага тэатральна-мастацкага інстытута створаны Мінскі інстытут культуры. Першым рэктарам быў прызначаны вядомы беларускі драматург Аляксандр Лявонцьевіч Петрашкевіч.

У 1975-м—1980-я гады Мінскі інстытут культуры інтэнсіўна развіваўся: адкрываліся новыя кафедры, ствараліся мастацкія калектывы, былі пабудаваны два інтэрнаты. 3 ростам патрэбы ў кіраўніках мастацкай самадзейнасці ў 1986 годзе быў створаны факультэт самадзейнага музычнага і харэаграфічнага мастацтва. У 1989 годзе адкрылася аспірантура.

Грамадскія пераўтварэнні ў дзяржаве ў пачатку 1990-х гадоў запатрабавалі карэнным чынам змяніць змест падрыхтоўкі кадраў для сферы культуры і мастацтва, таму была прапанавана праграма стварэння на базе Мінскага інстытута культуры еўрапейскай вышэйшай навучальнай установы універсітэцкага тыпу, рэктарам якой у 1992 годзе была абрана Ядвіга Дамінікаўна Грыгаровіч. Разам з педагагічным калектывам універсітэта яна і пачала рэалізоўваць гэтую праграму.

Пастановай Савета Міністраў Рэспублікі Беларусь № 662 Мінскі інстытут культуры быў пераўтвораны ў Беларускі універсітэт культуры. Адбылася маштабная рэарганізацыя факультэтаў і кафедраў, у выніку чаго пачалася падрыхтоўка спецыялістаў па новых спецыяльнасцях і спецыялізацыях.

Актывізаваліся міжнародныя сувязі, адкрыліся магістратура і Мазырскі філіял факультэта завочнага навучання. У 1996 годзе паспяхова прайшлі атэстацыя і акрэдытацыя універсітэта, а 26.11.1999г. загадам Міністэрства адукацыі Рэспублікі Беларусь № 703 універсітэту нададзены статус вядучай вышэйшай навучальнай установы ў нацыянальнай сістэме адукацыі ў сферы культуры.

Дасягнутыя поспехі не засталіся без увагі дзяржавы. Двойчы, у 1999 і 2000 гадах, Прэзідэнт Рэспублікі Беларусь А.Р.Лукашэнка наведваў БДУ культуры, у выніку чаго былі прыняты рашэнні аб умацаванні яго матэрыяльнай базы. Так, навучальнай установе былі перададзены Маладзёжны тэатр эстрады, мастацкая галерэя ў Палацы Рэспублікі, памяшканні па вул.Маскоўскай для адкрыцця другога вучэбнага корпуса, створаны навукова-творчая лабараторыя традыцыйных рамёстваў беларусаў, студэнцкі эстрадна-сімфанічны аркестр і інш.

2003 год стаў наступным крокам ва ўдасканаленні дзейнасці універсітэта. Адбылася рэарганізацыя яго структурных падраздзяленняў, у выніку з'явіліся новыя кафедры і факультэты, некаторыя з іх памянялі назвы з улікам перспектыў развіцця сучаснай сацыяльна-культурнай практыкі ў краіне.

Загадам Міністэрства культуры Рэспублікі Беларусь ад 08.10.2004 г. №166 Установа адукацыі “Беларускі дзяржаўны універсітэт культуры” перайменаваны ва Установу адукацыі “Беларускі дзяржаўны універсітэт культуры і мастацтваў”.

У пачатку XXI стагоддзя Беларускі дзяржаўны універсітэт культуры і мастацтваў заняў пачэснае месца сярод ВНУ краіны. Ён — адзін з арганізатараў і ўдзельнікаў буйнейшых міжнародных і рэспубліканскіх свят, форумаў, фестываляў, конкурсаў. Змест дзейнасці ўстановы мае дакладна акрэсленую нацыянальную накіраванасць. Тут вядзецца не толькі падрыхтоўка нацыянальнай інтэлігенцыі — спецыялістаў у галіне культуры і мастацтва, але і ажыццяўляюцца вывучэнне, захаванне, трансляцыя, прапаганда, творчае пераасэнсаванне культурнай спадчыны беларускага народа. Будучых спецыялістаў вучаць беражліваму стаўленню да нацыянальнага мастацтва.

За перыяд існавання больш за 25 000 маладых людзей атрымалі дыпломы універсітэта. Высокапрафесійны выкладчыцкі склад дае магчымасць Беларускаму дзяржаўнаму універсітэту культуры і мастацтваў рыхтаваць спецыялістаў вышэйшай кваліфікацыі, якія спалучаюць глыбокія спецыяльныя веды з грунтоўнай гуманітарнай падрыхтоўкай. У навучальны працэс укараняюцца сучасныя вучэбныя планы і праграмы, інфармацыйныя тэхналогіі і метады навучання. Беларускі дзяржаўны універсітэт культуры і мастацтваў мае высокі рэйтынг сярод універсітэтаў Беларусі дзякуючы якаснай навуковай рабоце і інавацыйнай вучэбнай дзейнасці, шырокамаштабнай мастацкай творчасці.

Стратэгія дзейнасці універсітэта ўвасобілася ў яго сімволіцы. Гэта сцяг сярэбранага колеру, пасярод якога на фоне чырвонага сонца крылы расправіла птушка. Птушка — сімвал творчасці і натхнення, сімвал звонкай песні. БДУ культуры і мастацтваў дае сваім вучням крылы і жадае ім чыстага неба і шчаслівага высокага палёту.