ПОИСК ПО САЙТУ
Беларусь Библиотечная



Гжельский государственный университетГомельский государственный технический университет
Белорусский государственный экономический университетБелорусская медицинская академия последипломного образования
Белорусский государственный технологический университетФНКА Белорусов России


Могилевский институт МВД Республики Беларусь
Акадэмія Міністэрства ўнутраных спраў Рэспублікі Беларусь



Нравится

Погода Минск
Информация сайта pogoda.by



Педагагічныя тэхналогіі

Педагагічныя тэхналогіі

арганізацыі ідэалагічна-выхаваўчай работы

са студэнцкай моладдзю

ў Беларускім дзяржаўным ўніверсітэце

культуры і мастацтваў

Сістэма ідэалагічна-выхаваўчай работы ва ўніверсітэце мае шматступенную структуру, якая ўключае рэктарат, аддзел выхаваўчай работы з моладдзю, прафесарска-выкладчыцкі склад, органы самакіравання студэнтаў, БРСМ, прафкам, шматлікія аб’яднанні студэнтаў. Каардынацыю выхаваўчай работы ажыццяўляе Каардынацыйная рада па справах студэнцкай моладзі і выхаваўчай рабоце, у складзе якой працуюць першы прарэктар, начальнік аддзела выхаваўчай работы з моладдзю, намеснікі дэканаў па выхаваўчай рабоце, дырэктар студгарадка, кіраўнік сацыяльна-педагагічнай і псіхалагічнай службы, дырэктар студклуба, дырэктар спортклуба, старшыня прафкама, сакратар ПА ГА “БРСМ”, старшыня студэнцкага савета ўніверсітэта, старшыні студэнцкіх саветаў інтэрнатаў, кіраўнікі студэнцкіх аматарскіх аб’яднанняў і клубных фарміраванняў.

Прыярытэтнымі кірункамі ў ідэалагічнай рабоце ўніверсітэта з’яўляецца фарміраванне палітычнай культуры студэнтаў, навуковага светапогляду, грамадзянскай пазіцыі, патрыятызму, умення з навуковых пазіцый ацэньваць падзеі сацыяльна-эканамічнага развіцця краіны і знешнепалітычныя працэсы, што сёння вылучаецца на адно з вядучых месцаў у рабоце са студэнцкай моладдзю.

Ідэалагічная і выхаваўчая работа ва ўніверсітэце ажыццяўляецца ў адпаведнасці з зацверджанымі перспектыўнымі планамі выхаваўчых структур, рашэннямі рэктарата, Каардынацыйнай рады па справах студэнцкай моладдзі і выхаваўчай рабоце, Савета ўніверсітэта і патрабаваннямі адміністрацыі БДУ культуры і мастацтваў.

З мэтай інфармавання прафесарска-выкладчыцкага складу, супрацоўнікаў і студэнтаў па асноўных пытаннях дзяржаўнай унутранай і знешняй палітыкі, сацыяльна-эканамічным развіцці Рэспублікі Беларусь, духоўным і культурным жыцці грамадства ва ўніверсітэце працуюць інфармацыйна-прапагандысцкія групы. Яны забяспечваюць правядзенне адзіных дзён інфармавання. У склад груп уваходзяць выкладчыкі грамадазнаўчых дысцыплін, члены пярвічнай арганізацыі Беларускага таварыства “Веды”, члены БРСМ. На базе бібліятэкі дзейнічае інфармацыйны цэнтр, які рыхтуе матэрыялы для інфармацыйна-прапагандысцкіх груп, афармляе стэнды-выставы літаратуры. У дапамогу адказным за выхаваўчую работу ва ўніверсітэце працуе пастаянна дзеючая выстава “Выхаваць грамадзяніна, патрыёта, спецыяліста”.

Падчас правядзення Адзінага дня інфармавання, інфармацыйных гадзін абмяркоўваюцца актуальныя праблемы ўнутранай і знешняй палітыкі дзяржавы, пытанні правядзення агульнаўніверсітэцкіх мерапрыемстваў, разглядаюцца праблемы жыцця калектыву ўніверсітэта. Стала традыцыйным праводзіць адзіныя дні інфармавання як мерапрыемствы комплекснага характару. Акрамя інфармавання, праводзяцца прэзентацыі студэнцкіх грамадскіх арганізацый, узнагароджванне пераможцаў конкурсаў і інш.

На факультэтах існуюць куткі інфармавання, дзе размяшчаецца інфармацыя аб найбольш важных падзеях, датах у жыцці краіны, пастаянна з’яўляюцца ўказы, рашэнні, дырэктывы Прэзідэнта Рэспублікі Беларусь, Урада краіны.  

З мэтай удасканалення ідэалагічна-выхаваўчай работы, праз вызначэнне інтэнсіўнасці росту ахопленасці студэнтаў рознымі яе формамі, ва ўніверсітэце распрацаваны і праводзіцца маніторынг ідэалагічнай і выхаваўчай работы. Падрыхтавана рэйтынгавая сістэма ацэнкі выхаваўчай і ідэалагічнай дзейнасці кафедр, факультэтаў, органаў студэнцкага самакіравання, студэнцкіх грамадскіх арганізацый.

Аддзелам выхаваўчай работы з моладдзю сумесна з інфармацыйным цэнтрам універсітэта ствараецца электронная база даных сучасных форм ідэалагічна-выхаваўчай работы. У мэтах вывучэння і абагульнення станоўчага вопыту ўзроўню ідэалагічнай работы распрацавана і зацверджана Палажэнне аб аглядзе-конкурсе на лепшую арганізацыю ідэалагічнай работы.

Ва ўніверсітэце назапашваюцца важныя традыцыі з вялікім ідэалагічна-выхаваўчым патэнцыялам, гэта штогод: Дзень ведаў і беларускага пісьменства, Дзень Сцяга і Герба БДУ культуры і мастацтваў, урачыстае пасвячэнне студэнтаў-першакурснікаў, фестываль мастацтваў “Арт-мажор”, агульнаўніверсітэцкі Дзень здароўя “Моладзь за здаровы лад жыцця”, зорныя паходы, паходы па культурных і гістарычных мясцінах краіны, канферэнцыі студэнцкіх грамадскіх арганізацый і аб’яднанняў і інш.

Пры аддзеле выхаваўчай работы з моладдзю працуе спартыўны клуб, галоўнай мэтай дзейнасці якога з’яўляецца прапаганда здаровага ладу жыцця і далучэнне студэнтаў універсітэта да фізічнай культуры і масавых відаў спорту і распрацавана і выконваецца праграма мерапрыемстваў па прапагандзе здаровага ладу жыцця студэнтаў універсітэта.

Значна актывізавалася дзейнасць аддзела выхаваўчай работы з моладдзю і спартыўнага клуба па прафілактыцы СНІД. Забяспечана шырокае інфармаванне студэнцкай моладзі па разнастайных аспектах прафілактычнай работы: распаўсюджванне аб’ектыўнай інфармацыі аб эпідэміялагічнай сітуацыі ў краіне, шляхах заражэння і фактарах перадачы ВІЧ-інфекцыі, азнаямленне з заканадаўчымі актамі, прававымі і сацыяльна-медыцынскімі мерамі прафілактыкі СНІД (адкрытыя прагляды літаратуры, адзіны дзень інфармавання, куратарскія гадзіны, круглы стол, пісьмовыя даведкі, вечар-папярэджанне, міні-апытанне па выніках Дня прафілактыкі СНІД, інфармацыйна-ілюстраваныя стэнды, відэапрагляд фільмаў).

Дынаміка ўзроўню фізічнага развіцця студэнтаў універсітэта ў параўнанні з папярэднімі перыядамі значна змянілася. Аб гэтым сведчыць удзел студэнтаў у спартыўна-масавых і аздараўленчых мерапрыемствах рэспубліканскага, гарадскога і раённага ўзроўню. Студэнты займаюць прызавыя месцы на Міжнародных конкурсах па спартыўных танцах, удзельнічаюць у турыстычных злётах. З вялікім задавальненнем студэнты прымаюць удзел у спартыўных гуртках і секцыях, у круглагадовай універсіядзе. Студэнты паспяхова выступаюць на рэспубліканскіх, раённых, гарадскіх спаборніцтвах па каратэ, вольнай барацьбе, тайландскаму боксу, настольнаму тэнісу, футболу, паўэрліфтынгу; удзельнічаюць у спаборніцтвах “Рэспубліканскай універсіяды сярод ВНУ”, агульнаўніверсітэцкім мастацка-спартыўным свяце “Дзень здароўя. Моладзь за здаровы лад жыцця” і інш.

Ва ўніверсітэце створана і працуе дабравольная дружына, якая актыўна ўдзельнічае ў ахове правапарадку ва ўніверсітэце і студэнцкіх інтэрнатах. З мэтай прафілактыкі правапарушэнняў і прававога выхавання студэнцкай моладзі ва ўніверсітэце дзейнічае савет БДУ культуры і мастацтваў па прафілактыцы безнагляднасці і правапарушэнняў непаўналетніх, камісіі па прафілактыцы правапарушэнняў на факультэтах.

Арганізацыяй работы па эстэтычнаму, грамадзянскаму, мастацка-творчаму выхаванню студэнтаў займаецца студэнцкі клуб. Клубам вядзецца значная работа па выяўленні і забеспячэнні творчых інтарэсаў моладзі, арганізацыі іх вольнага часу. Актыў студэнцкага клуба з’яўляецца ініцыятарам стварэння і правядзення фестываляў, творчых конкурсаў і культурна-масавых мерапрыемстваў ва ўніверсітэце і за яго межамі (Дзень ведаў, удзел у святах, прысвечаных Дню г.Мінска, Дзень Сцяга і Герба БДУ культуры і мастацтваў, прэзентацыя гурткоў інтэрнатаў універсітэта, конкурс-фестываль студэнцкай творчасці “PROяўленне”, студэнцкі навагодні баль, “Містэр універсітэт”, “Міс універсітэт”, конкурс патрыятычнай песні “Мы — усе дзеці твае, Беларусь”, конкурс аматарскай мастацкай творчасці паміж інтэрнатамі ўніверсітэта, і інш.). Студэнцкім клубам праведзена пашпартызацыя студэнцкіх аматарскіх калектываў мастацкай творчасці, клубаў, гурткоў і аб’яднанняў па інтарэсах.

Ва ўніверсітэце дзейнічаюць 67 клубных фарміраванняў, у тым ліку 30 творчых калектываў, 15 аб’яднанняў па інтарэсах і 22 гурткі, якія працуюць у студэнцкіх інтэрнатах № 1 і № 2, а таксама 6 музеяў.

Аснову сацыякультурнай дзейнасці студэнтаў БДУ культуры і мастацтваў складаюць захаванне, трансляцыя, засваенне і развіццё традыцый, каштоўнасцей і духоўна-маральнай культуры.

Традыцыйным стаў удзел творчых студэнцкіх калектываў у падрыхтоўцы і правядзенні грамадскіх мерапрыемстваў. Сярод іх канцэрты і тэатралізаваныя прадстаўленні на пляцоўках усіх раёнаў нашай сталіцы, Дзень Перамогі, Свята горада, Дзень Незалежнасці, Рэспубліканскі баль выпускнікоў, канцэрты, карнавалы ў сярэдніх і вышэйшых навучальных установах горада.

Мастацкімі калектывамі ўніверсітэта вядзецца вялікая ваенна-шэфская работа, заключаны дагавор аб супрацоўніцтве ў галіне культурна-выхаваўчай работы паміж БДУ культуры і мастацтваў і Дзяржаўным камітэтам пагранічных войск, Камітэтам дзяржаўнай бяспекі, Міністэрствам абароны Узброеных Сіл Рэспублікі Беларусь, Акадэміяй Міністэрства ўнутраных спраў Рэспублікі Беларусь.

Студэнты ўніверсітэта штогод прымаюць актыўны ўдзел у Навагодняй дабрачыннай акцыі “Нашы дзеці” з удзелам Прэзідэнта Рэспублікі Беларусь, у тэатралізаваных прадстаўленнях для дзяцей-інвалідаў, дзяцей-сірот.

Значная культурна-асветніцкая дзейнасць па адраджэнні нацыянальнай спадчыны вядзецца студэнтамі падчас праходжання вытворчай практыкі. Яны прымаюць актыўны ўдзел у арганізацыі дасугу сельскага насельніцтва і ў падрыхтоўцы клубных масавых мерапрыемстваў і свят. Значная колькасць практычных студэнцкіх работ стала асновай дыпломных, асобныя з якіх, тэарэтычна-абгрунтаваны і сталі навуковымі даследаваннямі.

Мастацкія калектывы і салісты ўніверсітэта прымаюць актыўны ўдзел у міжнародных і рэспубліканскіх фестывалях, конкурсах, выставах і іншых мастацкіх спаборніцтвах. Мастацкія калектывы і асобныя выканаўцы атрымліваюць дыпломы пераможцаў, лаўрэатаў і дыпламантаў. Высокую ацэнку майстэрству нашых выхаванцаў ставілі члены кампетэнтных журы ў розных краінах свету: Італіі, Германіі, Чэхіі, Славакіі, Літве, Расіі, Малдове, Швейцарыі, Бельгіі, Швецыі і інш.

Вялікая ўвага ў ідэалагічным выхаванні студэнтаў надаецца інстытуту куратарства, які аказвае дапамогу студэнтам у засваенні навыкаў вучэбнай працы, рашэнні іх псіхалагічных праблем. З гэтай мэтай ва ўніверсітэце працуюць Савет куратараў і адпаведныя саветы на факультэтах, мэтай якіх з’яўляецца аказанне дапамогі выкладчыкам і супрацоўнікам універсітэта ў арганізацыі вучэбна-выхаваўчай работы са студэнтамі, фарміраванні ў іх актыўнай жыццёвай пазіцыі, дысцыпліны і арганізаванасці. Савет куратараў каардынуе, абагульняе і распаўсюджвае перадавы вопыт работы куратараў на факультэтах, у студэнцкіх групах па выхаванні моладзі, а таксама сумесна з грамадскімі арганізацыямі ўніверсітэта распрацоўвае формы метадычнай дапамогі куратарам, органам самакіравання студэнцкай групы. Актывізавана работа куратараў з бацькамі студэнтаў: бацькоўскія сходы, сувязь па тэлефоне, пісьмовыя паведамленні, падзякі.

У дапамогу арганізатарам выхаваўчага працэсу ва ўніверсітэце працуе пастаянна дзеючы тэарэтыка-практычны семінар для адказных за ідэалагічна-выхаваўчую работу - “Выхаваўчыя магчымасці сучаснай ВНУ”.

Ва ўніверсітэце дзейнічае пярвічная арганіцыя БРСМ з правамі райкама, якая складае 1019 студэнтаў (36,7 % студэнтаў дзённай формы навучання). Члены пярвічнай арганізацыі ўдзельнічаюць у дабрачынных акцыях, суботніках, святах і кірмашах г.Мінска; прымаюць актыўны ўдзел у акцыі збору падарункаў для дзяцей-сірот і інвалідаў да навагодніх свят, экалагічнай акцыі “Моладзь за чысты Мінск”. ПА ГА “БРСМ” універсітэта сумесна са спартыўным клубам і прафкамам студэнтаў рэгулярна арганізоўваюць і праводзяць турыстычныя і зорныя паходы. Члены ПА ГА “БРСМ” прымаюць актыўны ўдзел у агульнаўніверсітэцкіх мерапрыемствах.

Пры пярвічнай арганізацыі дзейнічае Штаб працоўных спраў універсітэта, які займаецца працаўладкаваннем студэнтаў у вольны ад вучобы час і падчас летніх канікул. З верасня па май бягучага навучальнага года былі працаўладкаваны 98 студэнтаў, якія працавалі ва ўстановах культуры і адукацыі г.Мінска (прамоўтэры, кур’еры, арганізатары дасугавай дзейнасці, музычныя кіраўнікі, рознарабочыя, дызайнеры, мастакі-афарміцелі, педагогі-арганізатары і інш.).

Штабам быў арганізаваны валанцёрскі атрад, які праводзіў акцыі міласэрнасці, дабрачынныя акцыі і аказваў дапамогу школам-інтэрнатам, дзіцячым дамам, дамам састарэлых, Цэнтру рэабілітацыі дзяцей-інвалідаў г.п.Ждановічы. Значным кірункам работы ШПС з’яўляецца фарміраванне студэнціх педагагічных, сэрвісных, валанцёрскіх атрадаў для работы ў летні перыяд.

Вялікая дапамога з боку кіраўніцтва ўніверсітэта аказваецца пярвічнай арганізацыі БРСМ: удзел у штомесячных сходах актыву для справаздач і планавання, прыцягненне студэнцкага актыву груп і факультэтаў да ўдзелу ў дзейнасці арганізацыі, назначэнне надбавак, прэмій за актыўны ўдзел у мерапрыемствах ПА ГА “БРСМ”, набыццё інфармацыйных стэндаў для ПА ГА “БРСМ”; дапамога ў правядзенні сумесных творчых праектаў з іншымі арганізацыямі БРСМ ВНУ; рэгулярнае ўключэнне на пасяджэнні Савета ўніверсітэта, Каардынацыйнай рады па справах студэнцкай моладзі і выхаваўчай рабоце пытанняў, якія тычацца перспектыў развіцця арганізацыі; выкарыстанне спецыфікі кафедраў для творчых ініцыятыў арганізацыі БРСМ (напрыклад, валанцёры ў дабрачынных акцыях у дзіцячых дамах, дамах састарэлых, бальніцах і інш.); дапамога ў забеспячэнні аўдыторыямі, тэхнічнымі, матэрыяльнымі сродкамі для правядзення мерапрыемстваў. Аказанне дапамогі для ўдзелу ў вучобе студэнцкага актыву.

Прафкам студэнтаў універсітэта ажыццяўляе дзейнасць па ўсіх пытаннях навучання, працы, быту, аздараўлення і адпачынку студэнцкай моладзі ўніверсітэта. У склад прафсаюзнай арганізацыі ўваходзіць 2718 чал. (96,5 % студэнтаў дзённай формы навучання). Студэнцкая прафсаюзная арганізацыя БДУ культуры і мастацтваў ажыццяўляе ад імя студэнтаў прадстаўніцтва перад адміністрацыяй навучальнай установы па ўсіх пытаннях навучання, працы, быту, аздараўлення і адпачынку студэнцкай моладзі. Пры дапамозе дэканатаў вядзецца ўлік сацыяльнага становішча студэнтаў універсітэта, і трэба адзначыць, што ў гэтым кірунку плённа працуюць прафбюро факультэтаў.

Ва ўніверсітэце створана камісія па аздараўленні і санаторна-курортным лячэнні, якая вядзе ўлік студэнтаў, магістраў і аспірантаў, маючых патрэбу ў аздараўленні і санаторна-курортным лячэнні. Актыўна працуе жыллёва-бытавая камісія. Адным з прыярытэтных кірункаў дзейнасці камісіі з’яўляецца дапамога маладым сем’ям: матэрыяльная падтрымка, выдзяленне падарункаў да Дня маці і Новага года, аздараўленне дзяцей студэнтаў, рашэнне жыллёва-бытавых пытанняў і інш.

Улічваючы сацыяльнае становішча студэнтаў, прафкам клапоціцца пра дасуг студэнтаў: прапануе танныя білеты ў тэатры, на канцэрты, дыскатэкі. Праводзіць бясплатныя экскурсіі па гістарычных мясцінах Беларусі, вечары адпачынку з іншымі ВНУ, матэрыяльна падтрымлівае культурна-спартыўныя мерапрыемствы ўніверсітэта.

Прафкам студэнтаў універсітэта цесна супрацоўнічае з аддзелам выхаваўчай работы з моладдзю, ПА ГА “БРСМ”, студэнцкім клубам, спартыўным клубам і іншымі грамадскімі аб’яднаннямі.

 Вялікая ўвага і дапамога надаецца кіраўніцтвам універсітэта развіццю студэнцкага самакіравання. Традыцыйнымі сталі сустрэчы членаў рэктарата са студэнцкім актывам, дзе абмяркоўваюцца важнейшыя праблемы жыццядзейнасці студэнцтва, універсітэта. У дапамогу арганізацыі работы студэнцкага актыву ва ўніверсітэце распрацаваны палажэнне, праграма і план работы школы студэнцкага актыву “Лідар”. На падставе матэрыялаў І Рэспубліканскага студэнцкага форуму распрацавана нарматыўна-прававая база органаў самакіравання ўніверсітэта (Палажэнне, структура, функцыянальныя абавязкі кіраўнікоў падраздзяленняў).

Органы студэнцкага самакіравання ахапілі ўсе ўзроўні і напрамкі дзейнасці студэнтаў у вучэбны і пазавучэбны час. Па кожным кірунку (арганізацыйна-інфармацыйны, навучальны, навуковы, культурна-шэфскі, спартыўна-масавы, праваахоўны) забяспечваюцца каардынацыя дзейнасці і кантроль з боку аддзела выхаваўчай работы з моладдзю праз удзел у пасяджэннях студэнцкага савета ўніверсітэта, факультэтаў.

Студэнцкім інфармацыйным цэнтрам, які ўключае радыёгазету “Альма-радыё”, насценныя газеты факультэтаў і ўніверсітэцкія малатыражкі “Альма-папера”, “Басанож”, ажыццяўляецца дзейнасць, накіраваная на асвятленне асноўных і значных падзей жыцця краіны і ўніверсітэта, аформлены стэнды студсаветаў, выпускаюцца тэматычныя насценныя газеты і святочныя плакаты.

Трэба адзначыць актыўны удзел студэнцкага савета ў падрыхтоўцы і правядзенні агульнаўніверсітэцкіх мерапрыемстваў (Міжнародны дзень студэнтаў, Дзень прафілактыкі СНІДу, Навагодні студэнцкі баль і інш.). Значнай падзеяй для ўніверсітэта з’яўляецца штогадовая канферэнцыя студэнцкага актыву, на якой абмяркоўваюцца і вызначаюцца шляхі ўдасканалення ідэалагічна-выхаваўчай работы органаў самакіравання і грамадскіх арганізацый БДУ культуры і мастацтваў. Асаблівая ўвага надаецца ідэйна-патрыятычнаму выхаванню студэнцкай моладзі ўніверсітэта і цеснаму супрацоўніцтву са студэнцкімі саветамі іншых ВНУ г.Мінска.

Работа ва ўмовах студэнцкіх інтэрнатаў накіравана на далучэнне студэнтаў да ўдзелу ў маладзёжных аб’яднаннях і арганізацыях, створаных ва ўніверсітэце, павышэнне статусу студэнцкіх грамадскіх арганізацый (БРСМ, прафкам), студсаветаў, стварэнне спрыяльных умоў у інтэрнаце для заняткаў фізкультурай і спортам, барацьбу з курэннем і прафілактыку здаровага ладу жыцця, пошук аптымальных сумесных форм работы з куратарамі і кіраўнікамі творчых калектываў па выхаванні студэнцкай моладзі.

У сваёй рабоце выхавацелі інтэрнатаў выкарыстоўваюць разнастайныя формы правядзення мерапрыемстваў па адпаведных кірунках дзейнасці (спартыўныя спаборніцтвы, творчыя справаздачы гурткоў па інтарэсах, конкурс плакатаў антыснідаўскага кірунку, культурна-масавыя мерапрыемствы і інш.).

Сумесна са студсаветамі выхавацелі шмат увагі надаюць інфармацыйна-прапагандысцкай рабоце (афармленне насценных газет, інфармацыйных лістоў і стэндаў з сімволікай Рэспублікі Беларусь). Так, у інтэрнаце № 1 створаны пашыраны інфармацыйны сектар, які асвятляе дзейнасць студэнтаў у вольны ад вучобы час, інфармуе аб мерапрыемствах як у межах інтэрната, так і ўніверсітэта. Органамі самакіравання арганізуюцца ў вольны час работы па добраўпарадкаванні і азеляненні тэрыторыі. У мэтах выхавання ў студэнтаў эстэтычнай культуры быту, развіцця беражлівых адносін да маёмасці, паляпшэння жыллёва-бытавых і санітарна-гігіенічных умоў, падтрымкі парадку ў інтэрнатах рэгулярна праводзяцца агляды-конкурсы на лепшы пакой, блок, паверх. Студэнцкія саветы інтэрнатаў ажыццяўляюць сваю дзейнасць у адпаведнасці з Палажэннем аб інтэрнаце і працуюць у цесным кантакце з рэктаратам, адміністрацыяй інтэрнатаў, дэканатамі і грамадскімі студэнцкімі арганізацыямі. Для арганізацыі вольнага часу студэнтаў у інтэрнатах існуюць пакоі адпачынку, псіхалагічнай разгрузкі, пакоі органаў самакіравання, спартыўныя і гуртковыя пакоі.

У мэтах актывізацыі ідэалагічна-выхаваўчага працэсу, выяўлення і прафілактыкі стрэсагенных фактараў, пераадолення псіхалагічных праблем навучальнай і прафесійнай дзейнасці, а таксама праблем асобаснага і сямейнага кантэксту ва ўніверсітэце працуе сацыяльна-педагагічная і псіхалагічная служба. Яна функцыянуе па наступных формах дзейнасці: індывідуальнае псіхалагічнае кансультаванне, карэктуючыя трэнінгі і трэнінгі асобаснага росту, навучальныя праграмы для студэнтаў і выкладчыкаў, даследчая работа.

У мэтах метадычнага забеспячэння выхаваўчай і ідэалагічнай работы аддзелам выхаваўчай работы з моладдзю распрацаваны комплекс нарматыўна-прававых дакументаў, Палажэнняў, якія вызначаюць дзейнасць БДУ культуры і мастацтваў: Комплексная мэтавая праграма выхавання студэнцкай моладзі на 2009-2014 гг.; структура сістэмы выхаваўчай, ідэалагічнай работы; план ідэалагічнай работы ўніверсітэта; Праграма маніторынгу ідэалагічнай і выхаваўчай работы са студэнтамі. Распрацаваны і выконваюцца праграмы мерапрыемстваў па рэалізацыі дырэктыў Прэзідэнта Рэспублікі Беларусь № 1, 2, 3., Праграма мерапрыемстваў па прапагандзе здаровага ладу жыцця і адмаўлення ад курэння сярод студэнтаў універсітэта, Праграма мерапрыемстваў па недапушчальнасці прыцягнення студэнтаў да проціпраўнай дзейнасць палітычнага толку; Праграма неадкладных мер па арганізацыі ідэалагічнай работы ў БДУ культуры і мастацтваў (у выкананне загада Міністра адукацыі № 283 ад 01.04.2004 “Аб неадкладных мерах па арганізацыі ідэалагічнай работы ў ВНУ”), тэматычны план-графік сустрэч рэктарата, дэканатаў са студэнтамі і студэнцкім актывам універсітэта; палажэнне аб аглядзе-конкурсе на лепшую арганізацыю ідэалагічнай работы, Палажэнне савета БДУ культуры і мастацтваў па прафілактыцы безнагляднасці і правапарушэнняў непаўналетніх; Палажэнне камісіі факультэта па прафілактыцы правапарушэнняў; Палажэнне савета куратараў універсітэта; Палажэнне аб куратарскай рабоце БДУ культуры і мастацтваў; дапаможнік для арганізатараў выхаваўчага працэсу ў ВНУ “Школа студэнцкага актыву “Лідар”; метадычныя рэкамендацыі для куратараў студэнцкіх груп; комплексная мэтавая праграма выхавання студэнцкай моладзі (рэкамендацыі для арганізатараў выхаваўчага працэсу ў ВНУ), якая ўключае Канцэпцыю ідэалагічнай работы і Праграму ідэалагічнага суправаджэння выхаваўчай работы БДУКМ; метадычныя рэкамендацыі па арганізацыі ідэалагічнай і выхаваўчай работы ва УА БДУКМ; Палажэнне аб універсітэцкім конкурсе нацыянальнай і патрыятычнай песні “Мы — усе дзеці твае, Беларусь”, Палажэнне аб конкурсе вядучых; Палажэнне аб конкурсе-фестывалі студэнцкай творчасці БДУ культуры і мастацтваў ”PROяўленне”; Палажэнне аб Студэнцкім савеце Беларускага дзяржаўнага ўніверсітэта культуры і мастацтваў; Палажэнне аб аглядзе-конкурсе на лепшы паверх, блок, пакой у інтэрнатах; Палажэнне аб конкурсе аматарскай мастацкай творчасці паміж інтэрнатамі ўніверсітэта; Палажэнне аб агульнаўніверсітэцкай спартакіядзе паміж студэнтамі БДУ культуры і мастацтваў; Палажэнне аб Дабравольнай дружыне Беларускага дзяржаўнага ўніверсітэта культуры і мастацтваў і інш.

Рэктарат пастаянна клапоціцца пра ўмацаванне матэрыяльнай базы навучальнага і выхаваўчага працэсу. Адрамантаваны сталовая, бібліятэка, аўдыторыі, набыты новыя сцэнічныя касцюмы, камп'ютары і іншыя мультымедыйныя сродкі навучання. Працягваецца работа па ўмацаванні медыка-аздараўляльнай базы і сістэмы грамадскага харчавання.

Такім чынам, на сённяшні дзень можна адзначыць, што ва ўніверсітэце вядзецца мэтанакіраваная ідэалагічна-выхаваўчая работа са студэнцкай моладдзю, якая знаходзіцца пад пільнай увагай кіраўніцтва і працягвае пазітыўна развівацца.


Беларускі дзяржаўны ўніверсітэт культуры і мастацтваў



© Беларускі дзяржаўны ўніверсітэт культуры і мастацтваў